Темір Дулат: Ұлттық өнер өгей баланың күйін кешпеуi керек
Темір ДУЛАТ, күйші, домбырашы:
Саусағынан сиқырлы саз саулатқанда тыңдаушысының тұла бойын тітіркендіріп, делебесін қоздырып жіберетін жас жігіттің дәулескер күйші Жанғали Жүзбаевтың жиені екенін білген жоқпыз. Талантына тәнті болып, сыртынан сүйсініп жүрсек те, «бұл кім екен?» деген сұраққа жауап алғымыз келетін. Барлығын ойда жоқ жердегі кездесу шешті.
Тегімнің трайбализмге еш қатысы жоқ
– Азан шақырып қойған атым – Тимур, тегім – Жұбақов. Қазір Темір Дулатпын. Аты-жөнімді өзгерту туралы ұсынысты продюсерім жасады.
Кеңес кезіндегі идеологияның ықпалымен туу туралы куәлігіме Тимур деп жазылсам да, әжелерім мен ағайындарым мені әу бастан Темір деп атайтын. Сондықтан атымды ауыстырғанда қиналған жоқпын. Ал тегімді өзгертерде көп ойландым. Ата-анам қалай қабылдайды екен? деген сұрақ қатты мазалады. Ойымды шешем арқылы әкеме жеткіздім. Әкем келісімін бергеннен кейін жеті атамның ішінен жұрттың жадында тез жатталады, айтылуы, естілуі оңай болады деп Дулат бабамның есімін тегім ретінде таңдап алдық.
Сахнаға Темір Дулат болып шыға бастаған кезде баз біреулер ел арасына «өзі-нің жүзін, руын әспеттеп жатыр» деген мағынада жағымсыз әңгіме таратты. Шынымды айтайын, дәл осылай жасау өңім түгілі, түсіме кірген емес. Үш жүздің басы бір тудың астына бірігіп отырған бейбіт заманда рулық, тайпалық деңгейден аса алмай қалсам азаматтығыма сын емес пе?! Біле білген адамға қазақ руға бөлінбейді, рудан құралады. Халқымызда «атаңның баласы болма, адамның баласы бол» деген жақсы сөз бар. Жүз бен рудың намысын жырту азаматқа абырой әпермейді. Мен бір рудың емес, қазақ деген ұлттың баласымын. Ал Темір Дулат – сахналық есімім. Тегімнің трайбализмге еш қатысы жоқ.
Елімізде үлкен сахнаға аты-жөнін өзгертіп шыққан жандар маған дейін де болған, менен кейін де болады. Сондықтан түймедейді түйедей етіп көрсеткен дұрыс емес деп ойлаймын.
Жинағым жұртқа жетпей жатыр
– Менің орындауымдағы өзге авторлардың күйлері мен шетелдік, отандық сазгерлердің композицияларынан және өзімнің төл туындыларымнан құралған күй жинағым дайын тұрса да, жұртқа жетпей жатыр. Себебі аудиодыбыс жазу компаниялары жинағымды жазуға және таратуға ниетті емес. Ондағы мамандардың сөзінше, қазір бөлшек саудада аудиодискілер өтпейді. Адамдардың барлығы ұялы телефондарына өздері ұнатқан әндер мен күйлерді ғаламтордан жүктеп алады.
Жинағыма Рүстем Күлшібаевтың «Есіл күн» атты күйін, Нұрғаным Жексенбаеваның «Жүрек сыры», Жәнібек Боранбаевтың «Элегия» композицияларын, Испанияның атақты гитарашысы Армиктің «Малага» деген туындысын және басқа да шығармаларды енгіздім. Ал классик күйшілеріміздің туындыларына тиіскен жоқпын. Олардың күйін эстрадаға салып, шат-шәлекейін шығаруға арым жібермеді.
Мұхтар Әуезовтың «қазақтың қадірі мен ұяты күй де ғана қалды деген сөзі бар. Байқасаңыздар, әнде, жырда, дастанда деп тұрған жоқ, күйді атап, күйді көрсетіп тұр. Осы сөзді менің кейбір замандастарым назарларынан тыс қалдырады. Сөйтеді де күйді эстрадаға салып, құрылымын бұзады. Сәйкесінше, елге шалажансар дүние тарайды. Бұл – күйге және оны бізден кейін тыңдайтын ұрпаққа жасалып жат-қан қиянат.
Секен Тұрысбеков «Құрманғазы мен Тәттімбет тіріліп келсе көптеген күйшілердің төбесін ояды» дейді. Осы сөзден кейін біз өз төбемізді өзіміз оюдан сақтануымыз керек шығар деп ойлаймын.
Меніңше, күй эстрадаға айна-қатесіз, бұрмаланбай салынуы тиіс. Бұлай болмайтын болса, даңқты күйшілердің күйлеріне тиіспеу керек. Мұның орнына эстрадалық бағытта тың туындылар туғызған әлдеқайда тиімді әрі пайдалы.
Қаратау күйшілік мектебінің өкілімін
– Біз Генерал Асқаров, Төлеген Момбеков сынды дәулескер күйшілерді көріп, соларға еліктеп өстік. Нағашыларым Әлмұхан, Сәрсенғали, Жанғали Жүзбаевтар да білгендерін үйретуден жалыққан жоқ. Өз кезегімде мен Мұхтар Әуезовтың «Шаянға барсаң – әншімін деме, Созаққа барсаң – күйшімін деме» деген сөзін темірқазық тұтып, сәт сайын шеберлігімді шыңдап отыруға тырыстым. Уақыт өте келе түрлі жарыстарға қатыса бастадым. Әр жылдары Алматы, Орал қалаларында өткен күй сайыстарында лауреаттар мен дипломанттар қатарынан көрінсем, Шымкентте өткен Сүгір Әлиұлы атындағы республикалық байқауда бас жүлдені жеңіп алдым. Астанада өткен «күй құдіреті» атты фестивальде «алтын домбыраға» лайық деп танылдым. 2010 жылы Санкт-Петербург қаласында өткен халықаралық байқауда Қазақстанның намысын қорғап, бірінші орынға ие болдым. 2014 жылы Ар-
мения халқын қазақтың күйіне тәнті етсем, биыл сәуір айында Түркияның Ыстамбұл қаласында өткен қазақтардың құрылтайында өнер көрсеттім. Құрылтайдан кейін сол жақтағы қандастарымыздың қолқалауымен Ыстамбұлдағы қазақтардың тойында күй тарттым.
Қазақ ұлттық өнер университетінде еліміздің еңбек сіңірген артисі, профессор, күйші Тұрар Әліпбаевтың сыныбында білім алдым. Кәсіби күйші болғандықтан бізге шертпе күй мен төкпе күй қатар үйретілді. Десек те, жаныма шертпе күй жақын. Себебі мен домбырашылық пен қобызшылық қатар қанат жайған Қаратау күйшілік мектебінің өкілімін.
Күйдің бекзаттығын, саздың сиқырлығы мен шалқарлығын осы мектептен меңгердім.
«Келіншектау» һәм «86-16»
– Бүгінге дейін 2 күй шығарып, бейнебаян түсіріп, оны халыққа таратып үлгердім. Таяуда үшінші күйімнің тұсауы кесіледі.
Бірден айтайын, айына бір, жылына 12 күй шығарамын деп жалған сөйлей алмаймын. Себебі тыңқылдаған дүниенің барлығы күй емес. Бір күйдің бойында қуаныш пен қайғы, сүйініш пен күйініш қатар жатады. Оны тыңдаушыға жеткізу үшін барлығын жан-тәніңмен сезінуің керек.
Алғашқы күйім кіндік қаным тамған топырағыма деген сағынышымнан туды.
8 жылдан астам уақыт елге бара алмай, көңілім құлазып жүрген кезде әлдебір әуен жанымды жегідей жеді.Оны домбыраға салып едім, өз-өзінен күй болып төгіле жөнелді.
Тырнақалды туындыма ат қоярда көп ойландым. Ақыры оны «Келіншектау» деп атадым. Өйткені қарт Қаратаудың теріскей жағында тізбектеле орналасқан тау сілемдерін Созақ елі «Келіншектау» деп атайды.
Мен сол тауға, таудың етегіндегі елге күй арқылы құрметімді көрсетіп, сағынышымды жеткіздім.
Екінші күйімнің тарихы терең әрі ауыр. Шымкент қаласының Алпамыс батыр атындағы №40 мектебінде оқып жүрген кезімде физика пәнінің мұғалімі, Гүлмира есімді ұстазымыз оқушыларға 1986 жылғы желтоқсан оқиғасында қазақтың қыздары мен жігіттерінің көрген қорлығын жылап отырып айтып берді. Сол әңгіме менің жүрегіме жазылып қалды. Кейін Оңтүстік Қазақстан облыстық саз колледжіне оқуға түскен кезімде Марат Анашев есімді ұстазым да желтоқсан оқиғасы жайлы көп әңгімеледі. Бұл кісі де Гүлмира апайым секілді алаңда болған екен. Оқиға орнындағы суреті жандайшаптардың қолына түсіп, біраз әуресарсаңға да салыныпты. Абырой болғанда Марат деген аты Мұрат болып көрсетіліп, құжатындағы есімімен сәйкес келмегендіктен жөніне жіберіліпті. Бұл әңгіме де менің санама тоқылып қалды. Кейін «Ақ жауын» мемлекеттік камералық оркестрінің жетекшісі Секен Тұрысбеков ағамыздың қарамағына жұмысқа орналасқан кезде де желтоқсан жайлы естеліктер тыңдадым. Осы оқиғаға қатысқан Секен ағамыз да талай жайтты бүкпесіз баяндады.
Оқушы кезімнен санамда пісіп, жетіліп жүрген оқиға 2011 жылғы 16 желтоқсандағы Жаңаөзен оқиғасынан кейін көкірегімнен күй болып төгілді. Күйді «желтоқсан» немесе «желтоқсан боздақтары» деп атамақшы болдым. Сөйтіп, Секен ағамен ақылдастым. Ол кісі 2 оқиғаны байланыстырып тұрғанымды, Динаның «8 марты» мен Мәменнің «17-жыл» атты күйлерінен басқа қазақта атауы санмен қойылған күйдің болмағанын, Бахтың 40-симфониясы, Бетховеннің 17-симфониясы атты шығармалары бар екенін алға тарта келіп: «күйдің атын «86 – 16» деп қой деді. Осылайша, күйдің аты санмен қойылды.
«86 – 16» – елді көтеріліске шақыратын, бүлікке бастайтын күй емес, керісінше, халықты біріктіруді, ұйыстыруды көздейтін күй. Бұл менің тәуелсіздік үшін күрескен жастардың рухына қойған ескерткішім.
Таяуда таныстырылымы болатын үшінші күйімді әйгілі Мәшһүр Жүсіп сөз ететін, Абылай заманындағы ең атақты батырлардың бірі Бердіқожа Шанышқылыға арнадым.
Қаһарлы қолбасшы, жекпе-жекте жау түсірген жаужүрек батыр Бердіқожа әйгілі Қабанбай батырмен қанаттаса жүріп, Ұлытау өңіріндегі Бұланты, Білеуті және Сарысу бойындағы Итішпес, Алакөл маңындағы Аңырақай шайқасында, Іле басындағы Талқы, Ебі, Алакөл, Алтайдағы Ұлансу, Мамырсу, Шар, Шорға шайқастарында жасақ басқарған.
Жоңғарларға тойтарыс берілгеннен кейін Бердіқожа ел билеген. Оның есімі Қытай және Ресей жылнамаларында ерекше құрметпен аталады. Бердіқожа батыр қазақ пен қырғыз арасындағы қатынастарды реттеуге белсене араласқан. Бүгінгі қазақ-қырғыз шекарасының сол кездері қалыптасуына Бердіқожа батыр үлкен үлес қосқан. Дегенмен, қойы қоралас, елі аралас, бауырлас халықтың дау қуып, жау болуы салдарынан даңқты батыр қартай-са да қайратын көрсетіп, ат үстінде ерлікпен қаза болған.
Қазақстан тәуелсіздік алғаннан кейін Шанышқылы Бердіқожа батырдың мұрасы қайта тірілді. Көрнекті жазушы Мұхтар Мағауиннің арнайы зерттеу мақаласы жарық көрді. Бердіқожа батыр есімі Қабдеш Жұмаділов, Ақселеу Сейдімбек сияқты қарымды қаламгерлердің шығармаларында атала бастады. Қазір профессор, академик Бақтыбай Қасымбековтың ұйытқы болуымен батыр мұрасын жандандыру бағытында жүйелі жұмыстар атқарылып жатыр.
«Рэкетирге» қуаныштан, «Титаникке» қайғыдан жаздым
– Отандық киноиндустрияда пайда болған «Рэкетир» фильмін бір деммен көріп шықтым. Киноның өзі де, музыкасы да қатты ұнады. Біздің азаматтардың осындай сапалы дүние түсіргендігі үшін кеудемді мақтаныш сезімі кернеді. Шығармашылық топты қолдау мақсатында фильмнің трейлері пайда болған кезде оның саундтрегіне кавер жазып, ғаламтор арқылы тараттым. Оны мыңдаған адам көріп, өзара ой бөлісіп жатты. Тіпті «Астана» телеарнасы бұл туралы шағын сюжет жасады.
«Титаник», «Аватар» сынды фильмдердің музыкасын жазған кинокомпозитор Джеймс Хорнер әуе апатынан қайтыс болғанда қабырғам қайысқандай болды. Мен оның өнерін қатты бағалайтынмын. Домбырамен орындалған кавер арқылы Джеймс Хорнердің рухына тағзым жасағым келді. Бір сөзбен айтқанда, «Рэкетирге» саундтрегті қуаныштан, «Титаникке» қайғыдан жаздым.
Тобымыз тарап кетті
– 2007 жылы маған домбырашылардан құралған трио құру туралы ой келді. Осы арқылы домбыраның қасына скрипканы, баянды, саксафонды қосып өнер көрсетіп жүргендерге домбырамен-ақ кез келген туындыны орындауға болатынын дәлелдеуге ұмтылдым. Нәтижесінде Алтай Қыпшақбаев, Нүркен Якияев есімді талантты азаматтармен бірігіп, «Мырза» деген топ құрдық. Ісіміз бірден алға басты. «Мәңгілік» деген авторлық туындымызға бейнебаян түсірдік. Тойларға жиі шақырылатын болдық. Бір сөзбен айтқанда, біз қазақтың қара домбырасының мүмкіндігі мен бәсекеге қабілетті екенін басқаларға көрсете білдік.
Уақыт өте келе санамызды тұрмыс билей бастады. Соның салдарынан тобымыз тарап кетті. Топ құрамындағы жігіттердің бірі бизнеске бет бұрса, екіншісі отбасының қамымен кетті. Мен жалғыз қалдым. Басқа жігіттерді тартып, топты қайта құруға әрекеттенбедім. Себебі топ құрамындағы жігіттерді басқа адамдар алмастыра алмайтынын, алмастырғанның өзінде де бұрынғыдай болмайтынын білдім.
«Ақ жауынның» жайы жаныма батады
– Қазақтың дәулескер күйшісі Секен Тұрысбеков негізін қалаған «Ақ жауын» мемлекеттік камералық оркестрінің мүшелері Астанада кеңседен кеңсеге көшіп жүр. Астана қалалық филармониясының да жағдайы мәз емес. Ұлттық өнер өгей баланың күйін кешпеу керек. Шынымды айтсам, «Ақ жауынның» жайы жаныма қатты батады.
Билік басындағы азаматтар қос ұжымға бір шаңырақ берсе де қуанар едік. Оларға алғыстан басқа айтарымыз болмас еді. Әттең, осы күнге жете алмай жүрміз.
Дереккөз:aikyn.kz
Жазып алған
Қанат МАХАМБЕТ